Þjónusta Æfingastöðvarinnar

Á Æfingastöðinni er veitt sjúkraþjálfun og iðjuþjálfun í nánu samstarfi við skjólstæðinga, fjölskyldur þeirra og aðra sem veita þeim þjónustu og/eða umönnun. Þjónustan fer fram í húsakynnum Æfingastöðvarinnar eða í nánasta umhverfi barnsins, svo sem í leikskóla, skóla eða á heimili þess.

    

Börn sem koma á Æfingastöðina eiga oft í erfiðleikum með hreyfingar og færni við daglega iðju. Það er mismunandi hversu mikil áhrif þetta hefur á daglegt líf þeirra. Það er háð aldri barnanna og eðli vandans en ekki síður því umhverfi sem þau búa við.

Lögð er áhersla á að þarfir og væntingar barnsins og fjölskyldunnar vísi veginn í þjónustunni og að úrræðin séu fjölbreytt og sveigjanleg. Markmið þjónustunnar er ávallt að efla þátttöku og bæta lífsgæði barnsins og fjölskyldunnar.  

Þjónusta Æfingastöðvarinnar miðast við getu barnsins, áhuga þess og umhverfi. Hún beinist að því að aðstoða barnið við að nýta styrkleika sína til að eflast og ná auknum þroska, sjálfstæði og lífsgæðum.

Æfingastöðin starfar í nánu samstarfi við aðra þjónustuaðila.

---