Afhending Kærleikskúlunnar fór fram að viðstöddu margmenni í Listasafni Reykjavíkur í gær. Kærleikskúla ársins var jafnframt frumsýnd en hún ber heitið SKAPAÐU ÞINN HEIM (DRAW YOUR OWN MAP) og er eftir Yoko Ono.

Það var hinn skeleggi Leifur Leifsson sem hlaut kúluna í ár og tók hann við kúlunni úr hendi Yoko Ono og Þórdísar Yurie Jónsdóttur. Yoko þarf vart að kynna en Þórdís er japönsk-íslensk 6 ára stúlka sem bæði hefur verið í þjálfun á Æfingastöðinni og einnig notið dvalar í Reykjadal. 

Leifur hefur á engan hátt látið fötlun sína hindra sig í að láta drauma sína rætast en hann var á sínum tíma fyrsti maðurinn í hjólastól til að fara upp á Esjuna. Þar naut Leifur aðstoðar ófatlaðra einstaklinga en nú nýlega hóf hann að fara á fjöll með eigin handafli og fór m.a.  á Snæfellsjökul sl. sumar. Árið 2004 gerði Leifur heimildarmynd í samstarfi við Evrópusambandið sem bar heitið Öryrkinn ósigrandi. Myndin sem var í kjölfarið tilnefnd til verðlauna, fjallaði um fatlað fólk í hjólastól og hvað fatlað fólk getur gert þrátt fyrir fötlun sína, sem er oft á tíðum það sama og ófatlaðir geta gert ef viljinn er fyrir hendi. Það er einmitt það sem Leifur hefur staðið fyrir og verið ötull við að koma á framfæri á námskeiðum sínum hjá SOF og þannig hefur hann verið ungu fólki mikilvæg fyrirmynd. 

Styrktarfélagið telur Leif því vera vel að verðlaununum kominn og óskar honum hjartanlega til hamingju.