STYRKTARFÉLAG LAMAÐRA OG FATLAÐRA

Styrktarfélag lamaðra og fatlaðra var stofnað 2. mars 1952 og hefur því  verið starfandi í meira en fimmtíu ár. Það hefur það megin markmið að stuðla að aukinni orku, starfshæfni og velferð fólks með fötlun, einkum barna.

Helstu verkefni:

• að vera frumkvöðull að nýjungum  í þjónustu við fötluð börn og ungmenni á Íslandi           
• rekstur Æfingastöðvarinnar að Háaleitisbraut 13, Reykjavík
• rekstur útibús iðjuþjálfunar í Íþróttahúsinu Strandgötu, Hafnarfirði
• rekstur sumar- og helgardvalar fyrir fötluð börn og ungmenni í Reykjadal, Mosfellsbæ
• rekstur sumardvalar fyrir fötluð börn og ungmenni að Laugalandi í Holtum

Vissir þú að:

• Styrktarfélag lamaðra og fatlaðra var stofnað 1952
  
• fyrsta verkefni félagsins var stofnun og rekstur Æfingastöðvar í febrúar 1956
• hjá félaginu starfa um 40 manns þar af 25 sjúkra- og iðjuþjálfar
• um 850 einstaklingar fá þjónustu þjálfara á hverju ári
• aðstaða til sjúkra- og iðjuþjálfunar er með því besta sem gerist
  
• félagið hefur rekið sumar- og helgardvöl í Reykjadal, Mosfellsbæ í yfir 40 ár
• á hverju sumri koma 150 fötluð börn og ungmenni til sumardvalar í Reykjadal
• á hverju sumri koma 70 fötluð börn og ungmenni til sumardvalar að Laugalandi í Holtum
• sumardvalargestir koma frá yfir 26 sveitarfélögum allstaðar að af landinu
• á hverju sumri eru ráðin yfir 70 nemar úr framhalds- háskólum til starfa við sumardvalir félagsins í Reykjadal og Laugalandi í Holtum.
• 18 helgar yfir veturinn  dvelja á milli 10 og 20 fötluð börn og ungmenni í Reykjadal.

Skjólstæðingar félagsins eru að stórum hluta fötluð börn og ungmenni. Þeir sem nú fá þjálfun hjá Æfingastöðinni eru flestir fatlaðir frá fæðingu og margir mikið hreyfihamlaðir. Auk þess eru hjá félaginu stór hópur misþroska barna og unglinga með sértæka námsörðugleika. Nokkur hópur fullorðinna fær þjónustu bæði vegna sérþekkingar sem starfsfólk stöðvarinnar hefur yfir að ráða og vegna þeirrar aðstöðu sem félagið býr yfir. Á hverju ári koma um 850 einstaklingar til þjálfunar eða æfinga í Æfingastöð SLF að Háaleitisbraut. Hjá Iðjuþjálfun SLF í Hafnarfirði sækja að jafnaði 25 börn þjálfun og í Reykjadal koma um 200 börn árlega til dvalar.

Fyrsta verkefni Styrktarfélagsins eftir stofnun þess var starfræksla endurhæfingarstöðvar í kjölfar mænuveikisfaraldurs árið 1955. Fest var kaup á íbúðarhúsnæði að Sjafnargötu 14 í Reykjavík og hófst starfsemi stöðvarinnar í byrjun árs 1956. Þar var hún starfrækt í 12 ár eða til ársins 1968 þegar  starfsemi hófst í nýrri æfingastöð SLF að Háaleitisbraut 11-13 í Reykjavík. Við þann flutning varð aðstaðan mjög góð, þótti jafnvel með því besta sem þekktist á Norðurlöndum.  Sjá nánar sögu félagsins.