Leppalúði

Leppalúði er jólaórói Styktarfélags lamaðra og fatlaðra 2011. Í óróunum fara saman íslenskur menningararfur, hönnun og ritsnilld ásamt mikilsverðu málefni. Hér er kominn sjötti óróinn í seríuna en það eru þær Ingibjörg Hanna Bjarnadóttir, hönnuður og Ingibjörg Haraldsdóttir, ljóðskáld sem leggja félaginu lið í ár með túlkun sinni á Leppalúða.

Tilgangurinn með gerð og sölu Kertasníkis er að auðga líf fatlaðra barna og ungmenna.

  

LEPPALÚÐI

Hann Leppalúði þótti nokkuð baldinn.         Í bernsku var hann ódæll og átti enga vini. Af þessu varð hann vansæll og vildi hefna sín. Hann átti gamlan pabba sem engu nennti lengur og ævagamla mömmu sem litlu skárri var. Það var því vart að undra þótt Leppalúði tæki til sinna eigin ráða. Einn daginn þegar fólkið var komið út á tún og sló og sló af kappi varð einhverjum að orði: Hvar er Leppalúði? Allir fóru að leita hrópa og kalla en ekkert sást til Lúða. Hann er horfinn, sagði hreppstjórinn, ekki skal ég syrgja hann. Og göngum nú til verka! Nú leið og beið í sveitinni en aldrei kom sá stutti. Flestir voru fegnir, nema foreldrarnir hans, sem dóu fljótt úr hungri og detta því úr sögunni. Svo liðu ár og aldir.

Þá bar svo við eitt kvöldið þegar sólin var að setjast, að sást til mannaferða. Innan skamms var úr því skorið að þar fór enginn annar en Leppalúði sjálfur með allt sitt hyski. Hann hafði fyrir langalöngu útvegað sér konu, og konan sú var engin tískudrós, því þetta var hún Grýla sem allir krakkar þekkja og enginn þorir að hrekkja. En fólkið í sveitinni fór að súpa hveljur þegar það sá skarann sem á eftir henni kom: þar voru komnir synir þeirra Grýlu og Leppalúða í endalausri runu með öskur og gól. Svona strákar, mælti Leppalúði, og þeir þögnuðu strax. Segið nú fólkinu hvað þið heitið, sagði Grýla mamma þeirra sem kunni mannasiði. Sveinarnir brugðu við skjótt og æptu allir í senn: Stekkjarstaur, Giljagaur, Stúfur, Þvörusleikir, Pottaskefill, Askasleikir, Hurðaskellir, Skyrjarmur, Bjúgnakrækir Gluggagægir, Gáttaþefur, Ketkrókur og Kertasníkir! Og hana nú! bætti Grýla við. Svo fóru þau að sofa eins og kettir úti í mýri og úti er ævintýri. Ingibjörg Haraldsdóttir

HÖFUNDAR

Ingibjörg Hanna Bjarnadóttir

Ingibjörg Hanna Bjarnadóttir er fædd í Reykjavík árið 1976. Hún lauk BA-prófi í grafískri hönnun frá Listaháskóla Íslands árið 2001. Ingibjörg rekur hönnunarfyrirtækið IHANNA HOME sem hannar og framleiðir fylgihluti fyrir heimilið. Meðal þekktra verka hennar er herðatréð Krummi sem finna má í söfnum og hönnunarverslunum víðs vegar um heiminn.

Ingibjörg Hanna hefur tekið þátt í fjölmörgum hönnunarsýningum hér heima og erlendis, má þar nefna 100% Design í London haustið 2008 en í kjölfar þeirrar sýningar var fjallað um verk hennar í blöðum á borð við Elle Decoration, Dwell og Sunday Times. Meðal verðlauna og viðurkenninga sem Ingibjörg Hanna hefur hlotið eru fyrstu verðlaun í hönnunarsamkeppni Listasafns Reykjavíkur, Kraums og Hönnunarmiðstöðvar árið 2009.

Ingibjörg Haraldsdóttir

Ingibjörg Haraldsdóttir fæddist í Reykjavík 21. október 1942. Að loknu stúdentsprófi frá Menntaskólanum í Reykjavík hélt hún til náms í kvikmyndastjórn við Kvikmyndaskóla ríkisins í Moskvu og lauk þaðan Mag.Art. prófi árið 1969. Frá Moskvu fluttist hún til Kúbu þar sem hún starfaði sem aðstoðarleikstjóri en kom heim alkomin árið 1975.

Ingibjörg er meðal fremstu ljóðskálda okkar Íslendinga og er jafnframt þekkt fyrir að vera afburðagóður þýðandi. Ljóð Ingibjargar hafa verið þýdd á erlenda tungu, m.a. ensku, rússnesku og þýsku, en hún hefur verið eftirsóttur þátttakandi á bókmennta- og ljóðahátíðum hér heima og erlendis. Ingibjörg hefur hlotið fjölmargar viðurkenningar og verðlaun. Má þar nefna Ljóðaverðlaun Guðmundar Böðvarssonar, Íslensku bókmenntaverðlaunin, Menningarverðlaun DV fyrir þýðingu sína á Fávitanum eftir Dostojevskí og Íslensku þýðingarverðlaunin 2004 fyrir Fjárhættuspilarann eftir sama höfund. Þá hefur hún tvisvar verið tilnefnd til Bókmenntaverðlauna Norðurlandaráðs, 1993 og 2004.

 

LEPPALÚÐI FÆST Í VERSLUNUM  DAGANA 5.- 19. DESEMBER

Sjá sölustaði

 

---