Styrktarfélag lamaðra og fatlaðra hefur staðið að útgáfu Kærleikskúlunnar frá árinu 2003 og eru kúlurnar því orðnar níu talsins. Frá upphafi hafa kúlurnar fengið frábærar viðtökur landsmanna enda um að ræða einstakt safn listaverka eftir marga þekktustu listamenn okkar Íslendinga.

Listamenn Kærleikskúlunnar hafa allir gefið vinnu sína og þannig stutt dyggilega við starf í þágu fatlaðra barna og ungmenna.

TILGANGUR

Tilgangurinn með sölu Kærleikskúlunnar er að auðga líf fatlaðra barna og ungmenna, með því að efla starfsemi Reykjadals. Gera þannig fleirum mögulegt að njóta þar ævintýra tilverunnar í hópi með jafnöldrum - eignast vini og dýrmætar minningar.  

 BLESSUN

Biskupinn yfir Íslandi herra Karl Sigurbjörnsson hefur blessað Kærleikskúluna með eftirfarandi orðum: Blessun Guðs fylgi þessum fagra grip.
Blessaður sé sá hugur og þær hendur sem mótuðu hann,
blessaður sé sá sem gefur og þiggur,
blessuð séu þau sem njóta munu.
Þar sem góðvild og umhyggja eru að verki,
þar er Guð og englarnir hans björtu, góðu. 
Sú birta og góðvild lýsi þér.

 ÚTLIT

Ár hvert fær Kærleikskúlan nýtt útlit - og er verkið í höndum fremstu listamanna þjóðarinnar. Í grunninn er Kærleikskúlan tær eins og kærleikurinn -
með borða í rauðum lit, lit jólanna og kærleikans. Kærleikskúlan er blásin og eru því engar tvær kúlur nákvæmlega eins, en allar fallegar hver á sinn hátt. Kærleikskúlan kemur í kassa og fylgir henni bæklingur. Litir bæklinsins eru svartur og silfraður. Svartur táknar árstímann og silfraður birtuna sem er svo lýsandi fyrir boðskap jólanna.

KÆRLEIKSKÚLAN VEITT VERÐUGUM FYRIRMYNDUM

Fyrir hver jól er haldin athöfn í Listasafni Reykjavíkur þar sem  kúla ársins er frumsýnd. Biskup Íslands hefur blessað hverja kúlu auk þess að fyrsta kúla hvers árs er veitt verðugri fyrirmynd eða fyrirmyndum úr hópi fatlaðra.  

SAMSTARFSAÐILAR

Starfsfólk Áss vinnustofu sem rekin er af Styrktarfélaginu Ási, hefur séð um að setja saman kassana undir kúlurnar, klippa borðana og pakka svo öllu saman. Um margra vikna vinnu er að ræða sem unnin er af einstakri gleði og áhuga.

Hvíta húsið, Icelandair Cargo, Pósturinn og Listasafn Reykjavíkur hafa styrkt verkefnið og þannig sýnt áhuga sinn á aukinni velferð fatlaðra barna og ungmenna.

Listasafn Reykjavíkur og Kynningarmiðstöð íslenskrar myndlistar hafa aðstoðað við val á listamönnum. Skjal ehf. hefur gefið alla vinnu við þýðingar texta yfir í enska tungu.

Aðrir helstir eru Tónstofa Valgerðar og Þórdís Guðjónsdóttir prófarkalesari.

SÖLUAÐILAR

Allir þeir söluaðilar sem selja Kærleikskúluna gera það án þóknunar og leggja því málefninu mikilvægt lið.

Söluaðilar Kærleikskúlunnar eru:

Casa, Epal, Hafnarborg, Kokka, Kraum, Listasafn Reykjavíkur, Líf oglist, Módern, Blóma- og gjafabúðin, Póley, Norska Húsið, Valrós og Pósturinn.

Styrktarfélagið þakkar ofantöldum aðilum ómetanlegan stuðning.