Kærleikskúlan 2005 - Rúrí

Árið 2005 lagði Rúrí Styrktarfélaginu lið með verkinu Án upphafs - án endis.

ÁN UPPHAFS - ÁN ENDIS

,,Orðin vísa til þess að kærleikurinn á sér hvorki upphaf né endi.
Hann er óskilyrtur - óendanlegur - hann er.
Eins er með fossinn - hann rennur án afláts– hann er.
Fullkomin kúla hefur hvorki upphaf né endi, á sama hátt og hnötturinn okkar, Jörðin, er ein samfelld heild.
Einn af hinum máttugu fossum landsins birtist í brothættu, svífandi listaverkinu, sem örsmáum heimi, sem aftur kallast á við og speglar alheim þar sem jörðin svífur um í ómælisgeimi.”

Rúrí

Kærleikskúlan 2005 ÁN UPPHAFS - ÁN ENDIS

Rúrí með verk sitt

RÚRÍ

Rúrí er fædd árið 1951 í Reykjavík, stundaði listnám þar og síðar í Hollandi. Hún hefur alla tíð starfað og haldið sýningar á alþjóðlegum vettvangi, ýmist ein eða í samstarfi við aðra. Verk Rúríar eru hugmyndafræðislegs eðlis og hafa vakið verðskuldaða athygli. Þau er að finna í almennings- og einkasöfnum víða um heim. Útiverk hennar hafa verið afar áberandi, svo sem Regnbogi við Flugstöð Leifs Eiríkssonar, auk verka í Svíþjóð, á Ítalíu og víðar. Rúrí var fulltrúi Íslands á Feneyjatvíæringnum 2003 og vakti verk hennar Archive - Endangered Waters heimsathygli. Rúrí, sem er borgarlistamaður Reykjavíkur 2005, hefur hlotið margar viðurkenningar fyrir list sína m.a. verið sæmd sænsku Prince Eugen orðunn. (Sjá nánar www.ruri.is).

Frú Dorrit, Tómas, Guðbrandur og Bjarki

AFHENDING

Listasafn Reykjavíkur var klætt í hátíðarbúning þann 1. desember 2005, en þá afhenti frú Dorrit Moussaieff þar fyrstu Kærleikskúluna 2005, þeim Bjarka Birgissyni, Tómasi Birgi Magnússyni og Guðbrandi Einarssyni. Þeir þremenningarnir sem gengu hringinn í kringum landið undir kjörorðinu ,,Haltur leiðir blindan".

Á sinni erfiðu ferð vildu þeir létta byrðar annarra með því að vekja athygli á lífi og aðstæðum barna með sérþarfir í þeirri von að það yrði lóð á vogarskálarnar í baráttunni fyrir betra lífi, auknum möguleikum og réttindum fyrir börnin og fjölskyldur þeirra.

Bjöllukórinn