Ævintýrabúðir Reykjadals í Háholti í Skagafirði

Í sumar stendur börnum og ungmennum með ADHD og/eða einhverfu til boða að koma í nýjar ævintýrabúðir Reykjadals í Háholti í Skagafirði.

Þetta er í fyrsta sinn sem Reykjadalur býður upp á sumardvöl í Háholti í Skagafirði. Á svæðinu má finna afar fjölbreytta afþreyingu og erum við mjög spennt að móta dagskrá sumarsins. Meðal þess sem við stefnum á að bjóða gestum okkar upp á eru fjallgöngur, sundferðir, hestaferðir, river rafting og margt fleira. 

Hugmyndafræði ævintýrabúðanna í Háholti er sú sama og í Reykjadal. Lögð er áhersla á að allir sem þangað sækja fái að njóta sín á sínum eigin forsendum og skemmti sér í góðra vina hópi. 

Gleði, jákvæðni og ævintýri lýsa vel starfseminni í Reykjadal. Þar er haft að leiðarljósi að ekkert sé ómögulegt og ævintýrin látin gerast. Það er nákvæmlega þannig sem við munum haga starfseminni í Háholti - með sömu gleði og jákvæðni og í Reykjadal. Starfsfólk og gestir fá svo tækfæri til að skapa sín eigin ævintýri í fallegu umhverfi.

Vináttan er mikilvægur þáttur í starfsemi okkar og við höfum það í huga þegar við röðum í hópa að gestir okkar geti eignast vini og séu fremstir meðal jafningja.

Við vöndum okkur við að velja fólk til að starfa í ævintýrabúðunum í Háholti og leggjum mikinn metnað í að ráða hæft og drífandi starfsfólk. Við viljum ráða ungt fólk, á aldrinum 18-28 ára en sú ákvörðun byggir á því að við viljum að Reykjadalur sé staður fullur af orku og lífsgleði. Við teljum að unga fólkið sé tilbúið til þess að leggja allt á sig til að gleðja gestina sem hjá okkur dvelja. Starfsfólk í Háholti fær sömu þjálfun og starfsfólk sumarbúðanna í Reykjadal fær en nánar má lesa um það hér.

Við erum afskaplega spennt að skapa ný og spennandi ævintýri í Háholti í Skagafirði.

Það er enn hægt að skrá sig með því að smella hér

Háholt í Skagafirði