Fréttir

Kvenfélagssamband Gullbringu – og Kjósarsýslu varð 90 ára gamalt á dögunum. Kvenfélagskonur fögnuðu þessum áfanga á aðalfundi sínum laugardaginn 2. mars síðastliðinn. Í tilefni af afmælisári KSGK ákváðu kvenfélögin að veita sumarbúðunum í Reykjadal 900 krónur fyrir hverja félagskonu, en andvirði þeirrar styrkveitingar verður notað til kaupa á tækjum í samráði við forstöðumann Reykjadals.

Styrkir voru veittir til 47 verkefna félagasamtaka þann 8. mars síðastliðinn. Ásmundur Einar Daðason, félags - og barnamálaráðherra veitti Styrktarfélagi lamaðra og fatlaðra tvo styrki sem eru ætlaðir starfseminni í Reykjadal.

Reykjadalur hlaut styrk í fyrstu úthlutun úr samfélagssjóði Kaupfélags Kjalarnesþings. Reykjadalur fékk styrk að upphæð 3 milljónir króna til þess að nota í uppbyggingu á glænýjum gervigrassparkvelli á útivistarsvæði. Framkvæmd á sparkvelli er ein af mörgum til að uppbyggja allt útisvæðið en framkvæmdir verða teknar í áföngum.

Ólafur Orri Pétursson, Inga Steinunn Ólafsdóttir og Kristján Jóhannsson komu og færðu Reykjadal veglegt spilasafn að gjöf á dögunum.

Flottur hópur krakka á aldrinum 8 - 11 ára sem koma reglulega í sumar - og helgardvöl í sumarbúðirnar okkar í Reykjadal keppa í æsispennandi liðakeppni í Stundinni Okkar sunnudaginn 17. febrúar. Upptökur voru í Reykjadal 7. febrúar og voru tíu krakkar sem mættu til leiks.

Við minnum á að umsóknarfrestur um sumardvöl í Reykjadal fyrir árið 2019 er til 1. febrúar næstkomandi. Hægt er að sækja um 6 - 13 daga dvöl.

Kiwanisklúbburinn Mosfell færði Styrktarfélagi lamaðra og fatlaðra sláttutraktor að gjöf nú á dögunum. Traktorinn er kærkomin gjöf en hann mun verða vel nýttur í Reykjadal á sumrin. Sláttutraktorinn er afrakstur sælgætissölu Mosfells fyrir jólin 2018.

Verkfræðistofan Mannvit færði Reykjadal jólastyrk sinn fyrir jólin 2018. Styrkveitingin kemur í stað jólakorta fyrirtækisins. Margrét Vala Marteinsdóttir, forstöðumaður Reykjadals, tók við styrknum fyrir hönd Reykjadals núna í upphafi nýársins. Styrkurinn verður nýttur í endurbætur á útisvæði sumarbúðanna en framkvæmdir eru þegar hafnar

Attentus ráðgjafaskrifstofa ákvað fyrir jólin 2018 að veita sumarbúðunum okkar í Reykjadal styrkveitingu. Styrkveiting þessi kemur í stað þess að fyrirtækið kaupi og sendi út jólakort.